ته‌یمووره شه‌ل (1336-1405)*/ خۆرخێ لوییس بۆرخێس
ته‌یمووره شه‌ل (1336-1405)*/ خۆرخێ لوییس بۆرخێس
و: ئه‌نوه‌ر عه‌ره‌ب
پاشایه‌تی من، هی ئه‌م دنیایه‌یه
به‌ندیوان و سیاچاڵ و شمشێره‌کان
گوێ ڕایه‌ڵی فه‌رمانی منن که دوو جار، نایڵێمه‌وه.
که‌لامی من، ئه‌گه‌ر چی کورت، له ئاسنه.
ته‌نانه‌ت دڵی نهێنی ئه‌و مرۆڤانه‌ی وا له دووره ده‌ست ترین شوێنه‌کان قه‌ت ناوی منیان نه‌بیستووه
مل داوی حه‌ز و خولیای منن.
من، ئه‌و که‌سه‌ی شوانی له‌یلان بووم،
له پێرسپۆلیس ئاڵاکه‌م هه‌ڵدا
توونیه‌تی هه‌سپانم له چۆمی گۆنگ و جه‌یحوون شکاند
کاتێک له دایک بووم، شمشێرێکی تلیسماوی، له ئاسمانه‌وه به‌ربۆوه.
ئه‌و شمشێره منم و هه‌میشه ده‌مێنم.
میسرییه‌کانم تێک شکاند، یۆنانیکانیش،
رووسی ماندوو نه‌ناسی هاوپه‌یمانیشم تفر و توونا کرد
وێڕای تاتاره دڵ ڕه‌شه‌کانم،
من له گه‌لێک - سه‌ر- مناره‌م چێ کرد،
من چوار خوونکارم به ئه‌ڕابه‌که‌م سه‌رنخوون کرد
له به‌ر ئه‌وه‌ی نه‌یانویست به وه‌کازی پاڵشایه‌تیم خزمه‌ت بکه‌ن،
من کتێبی کتێبان، قورئان، کۆنتر له شه‌و و رۆژه‌کانم،
له کڵپه‌ی ئاگری حه‌له‌ب دا سووتاند.
من، ته‌یمووره سووری شه‌ل، زینۆکریت**ی سپیکه‌له‌ی میسریم
له ئامێز دا بوو، که داوێن پاک وه‌ک به‌فری کوێستان بوو.
کاروانه مه‌زنه‌کانم وه‌بیر دێته‌وه،
ئه‌و ته‌پ و تۆزه‌ی ناو سارا
هه‌روه‌ها شارێکی دووکه‌ڵاوی
له گه‌ڵ یه‌ڵمومی مه‌یخانه‌کان.
هه‌موو شتێک ده‌زانم و ده‌توانم،
تاڵه په‌رتووکێکی هێشتا نه‌نووسراو ئاشکرای کرد که من
مه‌رگم وه‌ک هه‌موو مه‌رگان ده‌بێ،
ئه‌وسا، ڕه‌نگ بزرکاو له‌و ده‌مه‌ی دا ده‌سته‌و یه‌خه‌ی مه‌رگم،
که‌مان گه‌ره‌کانم فه‌رمان ده‌ده‌ن تیره ئاسنییه‌کان به ئاسمان و نه‌یارانم دا ببارێنن.
ئاسمانی شین به ئالایه‌کی ڕه‌ش بڕازێننه‌وه.
تا هه‌موو بزانن که خوداکان مردووه.
خوداکان، منم.
لێی گه‌ڕێ با دیتران خۆیان به فاڵ و ئاسمان پێو و لا نما- وه سه‌ر قاڵ که‌ن
تا کوو بزانن کێن.
من ئه‌مما له هه‌سارانم،
له بوولێڵێکدا ژ خۆ ده‌پرسم
که بۆ له‌و ژووره قه‌ت ده‌رناچم
بۆ رێز له رۆژهه‌ڵاتی پڕ زه‌نازه‌نا ناگرم.
زۆر جار له خولیادا کۆیله‌کان ده‌بینم، ئه‌و خوێن تاڵانه‌ی
ته‌یمووره شه‌ل به ده‌ستی پڕ متمانه‌وه لایان ده‌دا و ده‌ڵێ:
ئه‌و ده‌بێ بخه‌وێ و نابێ له بیری چێ که هه‌ر شه‌و
ئه‌و حبه مۆجزاته که ئارامی و بێده‌نگی پێشکه‌ش ده‌که‌ن بخوا.
له شمشێری قه‌ف کراو ده‌گه‌ڕیم و نایدۆزمه‌وه
له سیمام ده‌گه‌ڕێم، ئه‌ویتره.
که وایه ئاوێنه ده‌شکێنم و سزیا ده‌درێم.
بۆ له‌کاتی له دار دانه‌کان دا له‌وێ نیم،
بۆ ته‌ور و سه‌ره‌کان نابینم؟
ئه‌و شتانه ده‌مشڵه‌ژێنێ،
به‌ڵام هیچ ڕوو نادا کاتێک ته‌یمووره شه‌ل دژی ئه‌و بێ.
وه من ته‌یمووره شه‌لم. به سه‌ر رۆژئاوا دا زال بووم و به سه‌ر رۆژهه‌ڵات دا زێرین، هه‌ڵبه‌ته...
------------------------
*بۆرخێس له باره‌ی ئه‌و شێعڕه‌وه ده‌ڵێ: ته‌یمووره شه‌لی بێچاره‌ی من له کۆتاییه‌کانی سه‌ده‌ی نۆزده، تراژێدیای کریستۆفێر و چه‌ند په‌رتووکی مێژووی که‌ی خوێندۆته‌وه.
** زینۆکریت: که‌سایه‌تی شانۆنامه‌ی ته‌یمووره شه‌ل نووسراوه‌ی کریستۆفێر مارلۆ و کچی پادشای میسره.
-ئه‌و شێعره له لایه‌ن مووده‌ب میر عه‌لاییه‌وه کراوه به فارسی.
-له سیروانی ژماره ۷۰۹ دا بڵاو بۆته‌وه.
برچسب‌ها: بۆرخێس, ئه‌نوه‌ر عه‌ره‌ب
